後生可畏

今朝去飲茶，聽到隔離搭枱的一對父子對話，無辦法唔些牙一下。
父：「今日放假開唔開心？」
子：「有得放假實開心ga。」
父：「咁你知唔知今日係乜嘢事放假？」
子：「我知，今日係世界詼諧日嘛。」
父：「你噏乜呀？今日係中國人民抗戰勝利七十週年呀！」
子：「我諗全世界都無一個地方，係會慶祝敵人打倒朋友囉！」
父：「日本仔果陣侵略中國呀，點會係朋友呀？」
子：「以你的智慧，其實唔容易解釋你聽。咁啦，二次大戰之後，係共產黨打走國民黨先至建國嘛，係咪？」
父：「係呀！」
子：「咁國民黨係敵人啦。跟住毛澤東先後七次感謝日本皇軍，話無佢哋，共產黨就得唔到政權嘛！」
父：「係咩？呢個我唔知喎。」
子：「唔知就睇吓書，上吓網。毛主席咁感激人哋，都可以話係朋友啦。宜家慶祝敵人打敗朋友週年紀念呀，你話詼唔詼諧呀？」
父：「乜你咁講呀？咁你都係中國人，檢閱軍隊，顯示下實力俾人哋睇，你都應該驕傲下啩。」
子：「驕乜嘢傲？就係身為中國人先感到慚愧呀！中國宜家無軍隊呀！解放軍係共產黨嘅軍隊，唔係中國嘅軍隊呀。」
父：「咁咪一樣？中國宜家係由共產黨領導嘛！」
子：「你都痴線，香港政府夠由 689 領導啦，咁佢隻龍蝦又即係香港政府的龍蝦呀？咁等於埋你嘅龍蝦啦，笨！」
父：「你都打橫嚟講。咁中國有事，解放軍都會幫手啦！」
子：「成日話你無腦，你又唔信。係兩樣嘢嚟呀，中國有十三億人口，共產黨得八千幾萬黨員，咁即係代表咩呀？」
父：「代表咩呀？」
子：「代表大家係唔同利益囉。打親貪捉到的都係共產黨人呀。即係共產黨搵中國人嘅笨呀。你身為中國人，驕唔驕傲呀？」
父：「車，次次同你講親，你都係話大陸唔好嘅。」
子：「唔好咁講喎，大陸有好人呀喎！有記者報導黑心食物呀，不過俾人殺咗之嘛。有律師會為公義發聲呀，不過俾人捉Ｑ晒之嘛。係街見到亞婆跌落地，仲有冇人扶呀？無？點解呀？俾人告到破晒產啦！大陸唔係無好嘢，不過俾人消滅緊之嘛！不過你唔使驚，你實唔會俾人消滅！」
聽到呢度，我真係忍唔到，笑咗出嚟！